إنتحار ورقة ب100
الساعة تمانية بالليل داخل مصنع
ايه يا عم أحمد إتأخرت ليه ؟ أنا كنت خلاص بقفل وماشى
معلش يا أستاذ حسام أنا متأسف جداً…على ما عرفت أدخل للباشا مكتبه ، قعدونى بره أستنى سيادته بتاع ساعتين…آل ايه البيه فى إجتماع…وبعدين زحمة المواصلات بقى إنت فاهم…المهم يا أستاذ حسام ظرف الفلوس أهه
ماشى يا سيدى…إستنى أعدهم وتمضى….كله تمام…إمضى هنا
أى أوامر يا أستاذ…أنا ماشى بقى
منتحرمش منك يا عم أحمد…تصبح على خير…ولا أقولك…إستنى خدنى معاك أنا كمان ماشى
داخل الخزينة المكتظة بالأوراق والفلوس ، دار هذا الحوار بين ورقتين بنكنوت فئة 100
نورت يا باشا…انت لسه جديد هنا ؟
هو احنا فين أصلاً ؟
ها ها شكلك لسه خام عالآخر…هو انت جاى منين ؟
من مكان سمعتهم بيقولوا اسمه البنك المركزى
أها…إنت لسه جديد نوفى بقى…تشترى العتبة طيب ؟
يعنى إيه ؟
ها ها خلاص انا بهرج معاك…عموماً إتشرفنا
ربنا يخليك…هو انت بقالك هنا كتير ؟
يووووه انا عفّنت هنا بس بصراحة انا مرتاح هنا اكتر
مرتاح اكتر هنا من فين يعنى ؟
فيك دماغ تسمع ؟
وماله…هو احنا ورانا ايه ؟
طب ركز بقى يا عم الحاج…ايام ما كنت مستجد زيك كده ومتفائل وحاسس بقيمتى طلعت من البنك مع راجل عجوز وطيب فى وسط معاشه وفضل محافظ عليا كتير وكنت ساعتها حاموت ويصرفنى بقى…كنت عاوز انطلق واشوف الدنيا…لحد ما جت اللحظة وصرفنى ويا ريتها ما جت
ليه…حصل ايه ؟
ادانى لصاحب العمارة وصاحب العمارة ادانى لإبنه البايظ…اللى دخلنى كباريه مليان طرقعة كئوس وضحك نسوان ومرقعة…المهم يا سيدى شوية ولقيت نفسى طاير فى الهوا فوق واحدة بترقص وبعدين داسوا عليا فى الأرض أكتر من ربع ساعة وراحوا لمنى وحاطنى فى كيس ريحته قرف ومشميتش هوا غير بعد يومين مع مسئول حسابات الكباريه وهو واخدنى مرتب …قلت فى سرى أخيراً حلاقى بيت يلمنى…بس للأسف ودانى مطعم كباب وكفتة..أصلها يا سيدى كانت ليلة خميس وقالك أتغذى كويس عشان البيت…إنت معايا يا ابو الكباتن؟
أيوه يا فندم…كمل
ها ها فندم ؟ ده انت اللى فندم يا مقطط يا قمر انت…المهم يا سيدى وما سيدك إلا أنا … إتخنقت من كتر الدخان لحد ما طلعت مع واحد إسمه الطيار…ده بقى يا نجم اللى بيودى الطلبات البيوت…المهم يا مشمش بعد ساعة من زحمة المواصلات ودانى باقى فلوس لواحد خليجى فى المهندسين…من العالم اللى جايه تهلس دى
إشمعنى يعنى..ليه بتقول كده ؟
جايلك فى الكلام اهه يا نايتى…شقة الراجل ده بقى كان فيها مزيكا عالية واتنين نسوان وشرب من نفس نوعية اللى شفتهم مع أخينا الأولانى فى الكبارية..ومليانة كمان دخان زى اللى شفته مع اخينا التانى فى محل الكباب بس ده بقى كان مختلف…ده كان لونه أزرق…مفيش يا بنى ساعتين وكان أخينا الخليجى ده متشقلب على راسه فى غيبوبة ونايم…راحوا الحريم مقلبنى وسط فلوس تانية كتير اوى وفكوا
يا نهار ابيض…ها وبعدين ؟
ولا حاجة يا صاحبى…لقيت نفسى بايت مع بلطجى فى منطقة إسمها الحيتية وآل إيه ده اللى بيحميهم وبيصرفلهم مسروقاتهم…المهم عشان مطولش عليك ، حظ أمى النجس… عم البلطجى ده فى نفس الليلة طبت عليه الحكومة واتمسك ورحنا كلنا القسم…ومن الدرج ده للدرج ده يا قلبى لا تحزن
يا حرام…حظك وحش اوى
لا يا حبيبى ده مش حظ.؟…دى تصرفات ونفوس نوعية كبيرة من البشر سايقها الشيطان وآل بيقولوا القرش بيسعد صاحبه…مع ان اللى أعرفه انهم يوم الدين حيتسئلوا صرفونى فى ايه…حيعملوا ايه ساعتها بقى…حيحكوا على الفضايح اللى انا شفتها دى ولا حيتكسفوا ويسيبونى أنا اللى احكى؟
المهم حسبنا الله ونعم الوكيل…أدى يا سيدى حكايتى…شفت اللى جرالى؟
انت يا اخينا
خخخخخخخخ
انت كمان نمت وسايبنى اغنى كده من الصبح؟
تفتح الخزينة وتُمد يد الصراف ليأخذ أخينا اللى عمال يرغى من الصبح ده
لألألألألألألألألألأ…بره تانى لأاااااااااااااااا
أنا عاوز أفضل هنا…أو أنتحر على خمسينتين
Like this:
This entry was posted on April 7, 2010 at 2:21 pm and is filed under short stories, thoughts, عربى with tags قصة قصيرة ، فلوس ، نفوس. You can follow any responses to this entry through the RSS 2.0 feed You can leave a response, or trackback from your own site.
April 16, 2010 at 7:11 am
[...] This post was mentioned on Twitter by Qwaider Planet. Qwaider Planet said: إنتحار ورقة ب100 #Thoughts #shortstories #قصةقصيرة،فلوس،نفوس | Qahwet Ahmed → http://bit.ly/cbUKIC [...]